Генеральный директор

А.П.Авсейко

1. Бланк паведамлення аб ДТЗ (далей – паведамленне) не запаўняецца ў выпадках, калі памер нанесенай шкоды ацэнены больш за 800 еўра, шкода нанесена жыццю або здароўю, ДТЗ адбылося з удзелам больш за два транспартных сродкаў, адсутнасці ў удзельнікаў ДТЗ дагавораў абавязковага страхавання грамадзянскай адказнасці ўладальнікаў транспартных сродкаў (далей – дагавор страхавання), у асоб, якія кіравалі транспартнымі сродкамі, якія ўдзельнічалі ў ДТЗ (далей – ТС), – правоў на кіраванне ТС, наяўнасці рознагалоссяў у ўдзельнікаў ДТЗ па характары і бачных пашкоджаннях ТС, прад’яўлення прэтэнзій асобамі, якія кіравалі ТС, да стану адзін аднаго.

2. Пры запаўненні паведамлення выкарыстоўваецца адзін камплект паведамлення для 2 ТС. Пры запаўненні паведамлення выкарыстоўваецца шарыкавая ручка і пішацца з націскам, каб можна было прачытаць копію.

3. Паведамленне запаўняюць уладальнікі (вадзіцелі) ТС. Пры гэтым яны самастойна вызначаюць уладальніка (вадзіцеля) ТС «А» і ўладальніка (вадзіцеля) ТС «В», пасля чаго імі запаўняюцца адпаведныя пункты паведамлення.

4. У паведамленні запаўняюцца ўсе пункты ў наступным парадку:

пункты 1–5, 13 запаўняюцца адным з удзельнікаў ДТЗ па ўзгадненні з другім удзельнікам ДТЗ;

у пункце 1 указваецца дата і час ДТЗ;

у пункце 2 указваецца месца ДТЗ (краіна, горад, вуліца, скрыжаванне, нумар дома, участак дарогі, км і г.д.);

у пункце 3 указваецца, нанесена ці не нанесена шкода жыццю або здароўю;

у пункце 4 указваецца, нанесена ці не нанесена матэрыяльная шкода іншым ТС, іншым аб’ектам і маёмасці ўдзельнікаў ДТЗ;

у пункце 5 указваецца прозвішча, уласнае імя, імя па бацьку (пры яго наяўнасці), месца жыхарства (месца прабывання) і нумар тэлефона сведак ДТЗ пры іх наяўнасці;

у пункце 6 указваюцца прозвішча, уласнае імя, імя па бацьку (пры яго наяўнасці) фізічнай асобы або поўная назва юрыдычнай асобы – уласніка ТС, месца жыхарства (месца прабывання) або месца знаходжання, краіна месца жыхарства (месца прабывання) або месца знаходжання, нумар тэлефона або e-mail. Пры гэтым уласнікам ТС «А» з’яўляецца асоба, указаная ў пасведчанні аб рэгістрацыі (тэхнічным пашпарце) ТС «А», а ўласнікам ТС «В» – асоба, указаная ў пасведчанні аб рэгістрацыі (тэхнічным пашпарце) ТС «В»;

у пункце 7 указваецца марка, мадэль, рэгістрацыйны знак ТС і краіна рэгістрацыі, пры наяўнасці прычэпаў да ТС – рэгістрацыйныя знакі і краіна рэгістрацыі;

у пункце 8 указваюцца назва страхоўшчыка, які выдаў страхавое пасведчанне (поліс, сертыфікат),

серыя, нумар страхавога пасведчання (поліса, сертыфіката) і тэрмін яго дзеяння, краіна, нумар тэлефона або e-mail, застрахаваны або не застрахаваны ТС па дагаворы добраахвотнага страхавання (аўтакаска);

у пункце 9 указваецца прозвішча, уласнае імя, імя па бацьку (пры яго наяўнасці), дата нараджэння, месца жыхарства (месца прабывання) вадзіцеляў ТС, краіна месца жыхарства (месца прабывання), нумары тэлефонаў або e-mail, серыя, нумар вадзіцельскага пасведчання на права кіравання ТС, адпаведныя катэгорыі, дата, да якой вадзіцельскае пасведчанне сапраўдна. Пры запаўненні бланка паведамлення ўладальнікам транспартнага сродку ў выпадку стаянкі транспартнага сродку ў дадзенай графе робіцца запіс «транспартны сродак стаяў»;

у пункце 10 указваецца стрэлкай месца першапачатковага ўдару ТС «А» і ТС «В»;

у пункце 11 указваюцца характар і пералік бачных пашкоджанняў ТС, атрыманых у выніку ДТЗ;

у пункце 12 тыпаграфскім спосабам указаны абставіны ДТЗ, патрэбныя з якіх адзначаюцца ўладальнікамі (вадзіцелямі) ТС на адпаведным баку паведамлення, а ў клетках узбуйненага фармату, размешчаных унізе, запаўняецца агульная колькасць адзначаных падпунктаў;

у пункце 13 складаецца схема ДТЗ. На схеме абазначаюцца контуры праезнай часткі з указаннем назваў вуліц (дарог і г.д.), а таксама напрамак руху, канечнае становішча ТС «А» і ТС «В», дарожныя знакі, паказальнікі, святлафоры, дарожная разметка, прадметы, якія маюць адносіны да гэтага ДТЗ;

у пункце 14 удзельнікамі ДТЗ пры неабходнасці ўдакладняюцца абставіны ДТЗ;

у пункце 15 ставяцца подпісы ўладальнікаў (вадзіцеляў) ТС «А» і ТС «В», якія пацвярджаюць дакладнасць выкладзенай у паведамленні інфармацыі і адпаведнасць схемы ДТЗ рэальнай сітуацыі;

у пункце 16 уладальнікамі (вадзіцелямі) ТС «А» і ТС «В» самастойна вызначаецца асоба, якая з’яўляецца адказнай за нанясенне шкоды ТС другога ўдзельніка ДТЗ, і ўказваюцца яго прозвішча і ініцыялы. Згода ўдзельнікаў ДТЗ з тым, што адзін з іх з’яўляецца асобай, адказнай за нанясенне шкоды другому ўдзельніку, сцвярджаецца яго подпісам. Пры гэтым дадзены пункт запаўняецца толькі асобай, адказнай за нанясенне шкоды.

5. Адзін экзэмпляр запоўненага паведамлення (арыгінал) застаецца ў пацярпелага для наступнага прадастаўлення страхоўшчыку разам з заявай аб выплаце страхавой кампенсацыі, другі (копія) – у асобы, адказнай за нанясенне шкоды.

6. Страхавальнік у выпадку выкарыстання паведамлення звяртаецца да любога страхоўшчыка для атрымання бясплатна новага паведамлення. Страхоўшчык абавязаны выдаць страхавальніку новае паведамленне па першым яго патрабаванні.